रुकुम पश्चिम । नेपाली सेनाको चण्डी दल गण रुकुम पश्चिमले जिल्लाको आठबिसकोट नगरपालिका ४, गोतामकोटमा निःशुल्क प्राथमिक स्वास्थ्य परीक्षण शिविर सम्पन्न गरेको छ। उक्त शिविरमार्फत ६७३ जनाले स्वास्थ्य परीक्षण गराएका छन् भने निःशुल्क औषधि समेत वितरण गरिएको छ।
शनिवार सम्पन्न शिविर चण्डी दल गणले नं. १९ बाहिनी अड्डाको नेतृत्व तथा नं. १९ फिल्ड एम्बुलेन्स गुल्मको समन्वयमा आयोजना गरेको थियो। शिविरबाट ५१८ जना महिला र १५५ जना पुरुषले सेवा लिएको नेपाली सेनाले जनाएको छ। सेवा लिनेहरूमध्ये ६२ जना बालबालिका रहेका थिए।
शिविरमा स्त्री रोग जाँच तथा उपचार, मनोसामाजिक परामर्श सेवा, सामान्य स्वास्थ्य परीक्षण तथा औषधि वितरण सेवा प्रदान गरिएको थियो। १८६ जनाले स्त्री रोग सम्बन्धी तथा १०० जनाले मनोसामाजिक परामर्श सेवा लिएको चण्डी दल गणले जानकारी दिएको छ।
गाउँमै निःशुल्क स्वास्थ्य परीक्षण र औषधि सेवा पाउँदा स्थानीयवासी अत्यन्तै खुसी भएका छन् । आठबिसकोट नगरपालिकाका उपप्रमुख धनकुमारी शाहीले दुर्गम क्षेत्रमा सञ्चालन गरिएको स्वास्थ्य शिविरले ग्रामीण भेगका नागरिकलाई ठूलो राहत पुर्याएको बताए । चिकित्सकसहितको टोलीद्वारा प्रदान गरिएको निःशुल्क स्वास्थ्य सेवा प्रभावकारी भएको उनको भनाइ छ।
उक्त शिविर नं. १९ बाहिनी अड्डाका बाहिनी पति सहायक रथी श्री पदमबहादुर बुढा (पिएच.डी.) को नेतृत्वमा सम्पन्न गरिएको थियो। शिविरमा चण्डी दल गणका गणपति शरद थापा, नं. १९ फिल्ड एम्बुलेन्स गुल्मका चिकित्सक तथा अन्य स्वास्थ्यकर्मीहरूको उपस्थिति रहेको थियो।
शिविर आठबिसकोट नगरपालिका कार्यालय, वडा नं. ४ को कार्यालय, स्वास्थ्य सेवा कार्यालय, ओरेक नेपाल, गोतामकोट स्वास्थ्य चौकी लगायतका संस्थाहरूको सहकार्यमा सम्पन्न गरिएको हो।
