सुर्खेत । मध्यपश्चिम विश्वविद्यालयमा जारी स्वतन्त्र विद्यार्थी युनियन (स्ववियु) निर्वाचनमा नेविसंघका उम्मेदवारहरूले प्रमुख पदहरूमा अग्रता कायम राखेका छन्। हालसम्म १ हजार ८०३ मत गणना पूरा हुँदा अध्यक्ष, सचिव, र कोषाध्यक्ष पदमा नेविसंघका उम्मेदवारहरू अघि देखिएका छन्।
अध्यक्ष पदमा नेविसंघका विवेक खड्काले ८०८ मत प्राप्त गर्दै अग्रता कायमै राखेका छन्। प्रतिस्पर्धामा रहेका अनेरास्ववियुका जगत जंग शाहीले ६१० मत प्राप्त गरेका छन्। अन्य उम्मेदवारहरूमा क्रमशः अखिल क्रान्तिकारीका प्रकाश वि.कले १६८, स्वतन्त्र उम्मेदवार मिलन वि.सिले ११४, नेक्राबिसंघकी अस्मिता सुनारले १३, अखिल समाजवादीका चिन बहादुर सहकारीले २५, राप्रबिसंघका विकल्प ओलीले १९ मत प्राप्त गरेका छन्।
सचिव पदमा नेविसंघका भुपेन्द्र आचार्यले ९८५ मत प्राप्त गर्दै आफ्नो अग्रता बलियो बनाएका छन्। अनेरास्ववियुका भुपेन्द्र भण्डारीले ५१५ मत प्राप्त गरेका छन्। अन्य उम्मेदवारहरूमा अखिल क्रान्तिकारीका मोहन चौलागाईंले १८३, नेक्राबिसंघकी सर्मीला कुमारी वि.कले २०, अखिल समाजवादीका सुदर्शन एडीले २७, राप्रबिसंघका सन्देश शाहीले ८४ मत प्राप्त गरेका छन्।
त्यस्तै कोषाध्यक्ष पदमा पनि नेविसंघकै उम्मेदवार लोक प्रसाद रिजालले ८९६ मत प्राप्त गर्दै अग्रस्थान ओगटेका छन्। उनका प्रतिस्पर्धी अनेरास्ववियुका विक्रम सिंह मन्दिरले ५३९ मत प्राप्त गरेका छन्। अन्य उम्मेदवारहरूमध्ये अखिल क्रान्तिकारीका दिप बहादुर सुनारले १९८, नेक्राबिसंघकी रमा गिरीले ४०, अखिल समाजवादीकी रितु बमले ५६, राप्रबिसंघका आशिष नाथ योगीले ५५ मत प्राप्त गरेका छन्।
स्ववियु निर्वाचनको मतगणना जारी रहँदा विश्वविद्यालय परिसर चुनावी माहोलले तातेको छ। विद्यार्थी नेताहरू र समर्थकहरू उच्च उत्साहका साथ मतगणनास्थलमा उपस्थित छन्। उम्मेदवारहरू अन्तिम चरणका मतहरू आफ्नो पक्षमा पार्ने रणनीतिमा सक्रिय देखिएका छन्।
