कोरोनाविरुद्ध प्रभावकारी कदम चाल्न निर्देशन

राजनीति

गृहपृष्ठ
राजनीति
कोरोनाविरुद्ध प्रभावकारी कदम चाल्न निर्देशन

कोरोनाविरुद्ध प्रभावकारी कदम चाल्न निर्देशन सरकारका काम कारबाहीप्रति असन्तुष्ट नेताहरु आश्वस्त !

विकास नेपाल

NULL

काठमाडौ । विश्वव्यापी महामारीका रुपमा फैलिएको कोरोना भाइरस रोकथाम तथा नियन्त्रणका लागि प्रभावकारी कदम चाल्न नेपाल कम्युनिष्ट पार्टी नेकपाले सरकारलाई निर्देशन दिएको छ । मंगलबार बालुवाटारमा बसेको नेकपाको सचिवालय बैठकले कोरोनाविरुद्धको काम जटिल र चुनौतिपूर्ण भएकाले थप प्रभावकारी कदम चाल्न सरकारलाई निर्देशन दिएको प्रवक्ता नारायणकाजी श्रेष्ठले जानकारी दिए ।

बालुवाटारमा झण्डै ५ घण्टा चलेको बैठकमा प्रधानमन्त्री केपी शर्मा ओली र उपप्रधान तथा रक्षामन्त्री इश्वर पोखरेलले कोरोना रोकथाम तथा नियन्त्रणका लागि सरकारले गरिरहेका कामका विषयमा सचिवालय सदस्यलाई ब्रिफिंग गरेका थिए । कोरोना रोकथाम सम्बन्धिको उच्चस्तरीय समन्वय समितिका संयोजक समेत रहेका पोखरेलले सरकारको सावधानी र ठोस कदम चालेकै कारण नेपालमा कोरोना फैलिन नपाएको र अहिले देखिएको संक्रमण नियन्त्रणमै रहेको बताएका थिए ।

रक्षामन्त्री इश्वर पोखरेलको दाबीलाई प्रधानमन्त्री ओलीले समेत समर्थन गर्दै कोरोनाका विषयमा धेरै चिन्ता नलिनुपर्ने बताएका थिए । तर सचिवालय सदस्यले नाकामा अलपत्र परेका नेपालीलाई उद्धारमा भइरहेको ढिलाई, कोरोना परीक्षणमा भइरहेको ढिलासुस्ती र स्वास्थ्य सामग्री खरिदमा भएको अनियमितताबारे प्रश्न गरेका थिए ।

जवाफमा प्रधानमन्त्री ओलीले सीमाका नेपालीलाई क्वारेन्टाइनमा राखिसकिएको, कोरोना परीक्षणको संख्या र दायरा बढाइसकिएकाले यो ठूलो विषय नभएको बताए । स्वास्थय सामग्री खरिदमा भएको भनिएको अनियमितता चर्चामा आएजस्तो सत्य नभएको र खरिदको जिम्मा दिइएको कम्पनीको बदमासीले समस्या उत्पन्न भएपछि सम्झौता रद्द गरेर सेनालाई दिने निर्णय गरिएको जवाफ दिएका थिए ।

तर स्वास्थ्य सामग्री खरिदमा रक्षामन्त्री पोखरेल, स्वास्थ्यमन्त्री भानुभक्त ढकालदेखि प्रधानमन्त्रीका सल्लाहकार विष्णु रिमाल, असगर अलि लगायतको संलग्ताबारे स्पष्ट पार्नुपर्ने माग सचिवालयका सदस्यले दोहोर्याएपछि अर्का अध्यक्ष प्रचण्डले यसलाई धेरै नगिलोज्न आग्रह गर्दै नेताहरुलाई आश्वस्त पारेका थिए ।

प्रचण्डको जवाफमा समर्थन जनाउँदै प्रधानमन्त्री ओलीले काम गर्दा समस्या हुने, गल्ती हुने भएपनि भएको कामलाई भयो भनेर प्रशंसा र समर्थन गर्न सचिवालय सदस्यलाई आग्रह गरेका थिए । यतिबेला विश्वमै संकट उत्पन्न भएका बेला समस्या बढाउने नभई समस्याको समाधान गर्न पार्टी एकढिक्का भएर अगाडी बढ्नुपर्नेमा जोड दिएका एक सचिवालय सदस्यले जानकारी दिए ।

बैठकमा बरिष्ठ नेता झलनाथ खनाल, मावध नेपाल र बामदेव गौतमले एकपछि अर्को प्रश्न अध्यक्षसामु तेस्र्याएका थिए । तर प्रधानमन्त्रीकै भनाईलाई समर्थन गर्दै अर्का अध्यक्ष प्रचण्डले काम गर्दा गल्ती हुने र यस्तो संकटको बेला विरोध नभई साथ सहयोग चाहिने भएकाले धेरै चर्कोसँग विरोध नगर्न आग्रह गरेका थिए ।

प्रवक्ता नारायणकाजी श्रेष्ठको विज्ञप्तीमा पनि सदस्यहरुले उठाएका प्रश्नमा अध्यक्षद्धयले भरपुर जवाफ दिएर आश्वस्त पार्न कोसिस गरेको उल्लेख छ ।

प्रेस विज्ञप्ति

नेपाल कम्युनिष्ट पार्टी (नेकपा) केन्द्रीय सचवालयकाे बैठक प्रधानमन्त्री निवास बालुवाटारमा सम्पन्न भएकाे छ ।

पार्टी अध्यक्ष तथा सम्माननीय प्रधानमन्त्री केपी शर्मा अाेली र अर्का अध्यक्ष पुष्पकमल दाहाल"प्रचण्ड"काे संयुक्त अध्यक्षतामा बसेकाे बैठककाे प्रारंभमै प्रधानमन्त्री एवं पार्टी अध्यक्ष केपी शर्मा अाेलीले काेभिड- १९ काे राेकथाम, नियन्त्रण रउपचारमा सरकार र राज्यका विभिन्न निकायले गरेका प्रयाश र हासिल भएका उपलब्धिहरूकाे बारेमा विस्तारपूर्वक जानकारी गराउनुभयाे ।

बैठकमा सचिवालय सदस्य, उपप्रधान तथा रक्षामन्त्री एवं उच्चस्तरीय निर्देशन समितिका संयाेजक ईश्वर पाेखरेलले यस काेराेना भाइरसकाे संक्रमणकाे समस्याले उत्पन्न स्थितिकाे सामना गर्न चालिएका कदम र गरिएकाे कामहरूकाे विस्तृत जानकारी गराउनुभयाे ।

बैठकमा सचिवालयका सबै सदस्यहरूले काेभिड-१९ नियन्त्रण, राेकथाम र उपचारका सम्बन्धमा अाअाफ्ना महत्वपूर्ण धारणा राख्दै सरकारले चालेका कदम र लिएका नीति सही नै रहेकाे र अझ प्रभाकारी रूपमा अघि बढ्न अावश्यक सुझावहरू राख्नुभयाे । उहाँहरूले बैठकमा प्रस्तुत गर्नुभएका सुझावहरूलाई अझ प्रभावकारी रूपमा कार्यान्वयन गर्न पनि बैठकमा जाेड दिनुभयाे ।

प्राप्त सुझावहरूलाई अावश्यकताकाे अाधारमा कार्यान्वयनमा ध्यान दिनेगरी प्रधानमन्त्री तथा पार्टी अध्यक्ष केपी शर्मा अाेलीले अाश्वस्त पार्नुभएर बैठक सम्पन्न भयाे ।

नारायणकाजी श्रेष्ठ
प्रवक्ता
नेकपा
२५ चैत २०७६